Kabanata 88
“S-sasabihin k-ko sa 'yo kung nasaan 'yung babae na hinahanap mo.” Hindi na talaga kaya ng isa.
“Baliw ka na ba!?”
“Hindi ko na kaya, Lester, sabihin na natin sa kanila kung gusto pa nating mabuhay,” sabi ng isa. So, Lester pala ang pangalan ng lalaking may asul na mata.
“Nababaliw ka na, nagkasundo tayo sa kanila, 'di mo ba naalala? Papatayin nila ang pamilya natin kapag sumuway tayo sa utos.” Habang nag-aaway sila, nalaman namin ang mga pangalan nila pero naguguluhan kami sa pinag-uusapan nila.
“Kung sinabi na natin ang gusto nila, tapos na sana ang usapan na 'to.”
“At sa tingin mo kapag nasabi na natin ang kailangan nila, palalayain nila tayo. Kapag nakuha na nila ang gusto nila, hindi na nila tayo kailangan at papatayin na nila tayo. Pareho lang ang kalalabasan, kamatayan lang ang makukuha natin kaya mas mabuti nang manahimik na lang tayo para hindi na maghirap pa ang mga pamilya natin.”
“Hindi mo ba alam kung sino 'yung taong nakatayo sa harap natin ngayon, Tart? Hindi ba siya 'yung nasa propesiya na tatapos sa lahat ng gulo na 'to?” Nagulat ako nang biglang lumingon sa akin 'yung taong ang pangalan ay Tart. Nanlaki ang mata ko dahil hindi ko akalaing alam niya 'yung tungkol sa propesiya. Si Lester naman, nakatitig lang sa akin at hindi sumagot.
Base sa sinasabi ni Lester, parang napilitan lang silang sumali sa hindi maintindihang grupo na 'to dahil may kapalit na gusto sila. Ayaw nilang sabihin sa amin ang impormasyon dahil baka mapahamak ang mga mahal nila sa buhay.
“Isa lang ang salita namin, kung sasabihin naming palalayain namin kayo, gagawin namin 'yun,” sagot ni Tiyo Raso.
“Paano namin masisiguro na pakakawalan niyo kami?” Hindi namin inaasahan 'yung pangako ni Lester. Siguro, desidido silang sabihin ang lahat ng alam nila.
'Ipakikita ko sa inyo kung ano ang mangyayari sa hinaharap kung gusto niyo.” Napunta ang atensyon namin kay Marcus. Naglabas siya ng isang bag na naglalaman ng itim na buhangin ni Mercedes. Inilagay niya ito sa lupa.
“Kailangan ko ng kaunting dugo mo para maipakita ang kinabukasan mo,” paliwanag ni Marcus. Agad siyang pumunta sa likod ni Lester para kumuha ng dugo niya.
Matapos maglaglag si Marcus ng ilang patak ng dugo sa buhangin, itim na usok ang nabuo sa buhangin kasabay ng pagbuo ng imahe. Makikita sa larawan ang isang lalaki na kung hindi ako nagkakamali ay kumakatawan kay Lester at isang babae at isang bata na masayang kumakain sa mesa.
“Ngayon, malinaw na ba sa inyo na nagsasabi kami ng totoo?” tanong ni Tiyo Raso. Tumahimik 'yung dalawa sandali at pagkatapos ng ilang sandali, nagkatinginan silang dalawa at tumango.
“Handa na kaming sabihin sa inyo kung nasaan 'yung hinahanap niyo…”