Kabanata 90
Tumayo ako mula sa kinauupuan ko at galit na sinagot siya. "Walang may gusto nito kaya huwag mong sabihin 'yan kasi wala rin akong ideya kung anong nangyayari," sagot ko. Hindi siya sumuko at tumayo at buong tapang na lumapit sa akin. Agad na tumayo sina Sil, Berg at Hanz, at iba pa para awatin kami.
"'Yan ang problema sa inyo mga Alpha kasi kayo ang may karapatang magdesisyon, hindi niyo iniisip ang kapakanan ng iba." Nag-aalab na sa galit ngayon at susugurin sana ako pero pinigilan ko lang siya.
Hindi ko na mapigilan ang emosyon ko at dahan-dahan kong kinuyom ang kamao ko at agad na nagpakawala ng suntok. Napatingin sa akin ang lahat dahil sa ginawa ko, umatras ng kaunti si Marcus dahil sa lakas ng suntok ko.
Hindi siya nagpatalo kaya mabilis siyang nag-iba ng anyo at agad na sumugod sa akin para bumawi. Mabilis siyang sumugod sa akin pero agad siyang hinila palayo nina Berg, Yuri, at Sil, habang hawak naman ako nina Hanz at Val.
"Tumigil kayong dalawa!" sigaw ni Tiyo Raso kaya unti-unting kumalma ang lahat. "Para kayong mga bata kung umakto, walang may gustong mangyari 'to at hindi tayo dapat ang nag-aaway dahil dapat nagtutulungan tayo," dagdag niya.
Yumuko ako dahil sa hiya, ako dapat ang nakakaintindi dahil ako ang tinatawag na Alpha at ako ang magsisilbing modelo para sa kanila. Hindi ko lang talaga mapigilan ang emosyon ko dahil sa sinabi ni Marcus, alam ko kung gaano niya namimiss ang nanay niya ngayon at alam ko na 'yun ang pinakamasakit na pangyayari sa buhay ng isang tao, ang malayo sa nanay niya. Pero hindi niya dapat sinisisi ang pamilya ko dahil alam ko na walang may gusto sa insidenteng ito. Kaya handa na akong tumulong ngayon para solusyunan ang problema.
Tumingin sa akin si Marcus bago siya tumakbo palayo sa amin na ikinagulat ng ilan sa amin.
"Marcus!" sigaw ni Sil at akmang susundan siya.
"Tama na, hayaan muna natin siyang mag-isip," sabi ni Tiyo Raso at huminto si Sil.
Tahimik ang lahat mula nang umalis si Marcus.
"Kung plano niyo lang sumugod sa ganitong dami niyo, wala kayong pag-asang manalo laban sa kanila." Napalingon ang atensyon namin nang biglang nagsalita si Lester. "Ang mga miyembro na sumali sa grupong Flame Alpha na kinabibilangan natin ngayon ay napakalakas," dagdag niya.
'Flame Alpha?' nagtataka kong tanong.
"'Yun ang tawag sa grupo na kinabibilangan natin, nabuo 'yun dahil sa kagustuhan na maging Alpha ng grupo na ngayon ang lider ng grupong ito. May mga posisyon ang Flame Alpha, kabilang tayo sa pinakamababang posisyon kasama ang iba pang mga bampira at werewolves, at tayo 'yung nagbibigay ng impormasyon. Ang pangalawang grupo ay 'yung tinatawag na Tripo, na may anim na miyembro at may mga kakaibang kapangyarihan, sila ang kanang kamay ng lider."
"Sino ba ang sinasabi mong lider?" tanong ni Yuri.
"Hindi natin alam ang pangalan at itsura niya dahil hindi pa natin siya nakikita. Pero nangako siya sa mga miyembro na sumali sa grupo niya na bibigyan niya sila ng magandang buhay. Gusto nilang sakupin ang buong mundo at patayin ang lahat ng nabubuhay para hindi na nila kailangang pigilan ang pagkauhaw nila sa dugo. Kung magtatagumpay sila madali na lang sa kanila na pumatay ng tao para gawin itong pinagkukunan ng pagkain," paliwanag ni Tart na ikinagulat naming lahat.
"Tripo..." Hindi ko alam kung bakit biglang lumabas sa bibig ko ang salitang 'yun.